Il-Ministru għall-Edukazzjoni u x-Xogħol Evarist Bartolo u
l-Ministru għad-Djalogu Soċjali, Affarijiet tal-Konsumatur u Libertajiet Ċivili
Helena Dalli nidew id-dokument ‘Trans, Gender Variant and
Intersex Students in Schools’. Dan id-dokument, li jista’ jiġi mniżżel
mis-sit education.gov.mt, ipoġġi fuq il-mejda
qafas importanti f’dan il-qasam f’ambjent skolastiku.
Il-Ministru
għad-Djalogu Soċjali, Affarijiet tal-Konsumatur u Libertajiet Ċivili Helena
Dalli semmiet kif din il-policy toħroġ mill-obbligi tal-Liġi dwar
l-identità tal-Ġeneru li l-Parlament approva xahrejn ilu.
Semmiet kif bosta
pajjiżi barranin qed iħarsu lejn il-mudell Malti għat-tfassil ta’ liġi simili.
Dr Dalli qalet li l-Gvern għandu dover li jara li ma jkomplix iżid piżijiet aktar milli
diġà toħloq is-soċjetà fuq persuni trans u intersex hekk kif
kulħadd għandu jkollu l-istess drittijijet.
Silvan Agius Policy
Coordinator fi ħdan il-Ministeru għal-Libertajiet Ċivili spjega kif il-liġi
dwar l-identità tal-ġeneru, l-espressjoni tal-ġeneru u l-karatteristiċi
tas-sess taħseb diġà għal dokumenti ta’ politika bħal dan li qed ikun imniedi
llum minħabba li Artiklu 13 jobliga lill-Gvern sabiex fi żmien tliet snin
idaħħal il-miżuri kollha neċessarji sabiex kull persuna tkun trattata b’dinjità
u tkun tista’ tirnexxi fis-soċjetà tagħna. F’das-sens
il-Ministeru tal-Edukazzjoni hu l-ewwel ministeru li qed idaħħal qafas ta’
politika li jilħaq dan, fi żmien rekord ta’ xahrejn biss.
Intant, it-tnedija
ta’ din il-policy edukattiva għal tfal trans, gender variant u
intersess kienet imfaħħra minn ILGA Europe li ddeskrivitha bħala l-ewwel waħda
tax-xorta tagħha fl-Ewropa hekk kif l-ebda pajjiż ieħor Ewropew s’issa m’għandu
policy li tiffoka b’mod speċifiku fuq il-bżonnijiet ta’ tfal trans,
gender variant u intersess. ILGA Europe qalet li din il-policy tista’
twitti t-triq għal inizjattivi simili madwra l-Ewropa kollha.